მოგვწერეთ იდეა

თბილისში, სამგორის რაიონში კიდევ ერთი საბავშვო ბაღის მშენებლობა დაიწყო

თბილისში კიდევ ერთი საბავშვო ბაგა-ბაღის მშენებლობა დაიწყო. სკოლამდელი აღზრდის დაწესებულება ამჯერად სამგორის რაიონში, ვარკეთილის მესამე მასივში შენდება.

პროექტის მიმდინარეობას თბილისის საბავშვო ბაგა-ბაღების სააგენტოს ხელმძღვანელი კახაბერ გვანცელაძე გაეცნო. მისი თქმით, დაწესებულების ამოქმედების შედეგად, 230-ით მეტ ბავშვს მიეცემა სკოლამდელი განათლების მიღების შესაძლებლობა.

„დავიწყეთ კიდევ ერთი ბაგა-ბაღის მშენებლობა. აქ 8 ჯგუფი იფუნქციონირებს, რაც ნიშნავს, რომ დაწესებულება მიიღებს 230 აღსაზრდელს, დაასაქმებს 60-მდე ადამიანს. შენობა ადაპტირებული იქნება შშმ პირთათვის, უზრუნველყოფილი იქნება სახანძრო უსაფრთხოება, დამონტაჟდება ვიდეოსამეთვალყურეო სისტემები და დაცული იქნება ბავშვთა უსაფრთხოებისთვის საჭირო ყველა სტანდარტი“, - განაცხადა კახაბერ გვანცელაძემ.

გვანცელაძის განმარტებით, მშენებლობის დასრულება წლის ბოლოსათვის იგეგმება.

სამგორის რაიონში ამჟამად 27 ბაღია, მომავალი წლიდან კი ეს რიცხვი 29-მდე გაიზრდება.