მოგვწერეთ იდეა

ქუთაისში ახალ კორპუსს უნებართვოდ აშენებულ სართულებს მოანგრევენ

ქუთაისის ცენტრში, 7 სართულიანი კორპუსის ბოლო ორი სართულის დემონტაჟის მიზნით, ქუთაისის მერიამ ტენდერი გამოაცხადა. ქალაქის ხელისუფლება თამარ მეფის 10–ში ნებართვის გარეშე აშენებული ორი სართულის დემონტაჟში 70 000 ლარს გადაიხდის. 

უნებართვო სართულების დემონტაჟი ტენდერში გამრჯვებულმა კომპანიამ მიმდინარე წლის 1 აგვისტოდან 31 დეკემბრის ჩათვლით უნდა განახორციელოს.

მერიის მიერ ტენდერის გამოცხადების შესახებ არ იციან კორპუსის მშენებელ კომპანიაში.

კომპანია სახლი # 1–ის იურისტი, ერმილე ჭეიშვილი ამბობს, რომ საქმე სასამართლოშია და მერიას შენობის ნაწილის დემონტაჟის უფლება არ აქვს.

მისივე თქმით, პარალელურად სადავო ორი სართულის პროექტი კულტურული მემკვიდრეობის სააგენტოში არის გაგზავნილი, რომელმაც ერთხელ უკვე დაიწუნა პროექტი და ამჟამად კვლავ კორექტირება მიმდინარეობს.

ქუთაისის მერიამ ქალაქის ცენტრში მდებარე კორპუსზე სართულების უნებართვოდ მშენებლობის ფაქტი გასული წლის მიწურულს დააფიქსირა, მაშინ, როცა მშენებლობა უკვე დასრულებული იყო.

მერიის ადმინისტრაციული ზედამხედველობის სამსახურში მაშინ ამბობდნენ, რომ მშენებელ კომპანიას ნებართვა მხოლოდ 5 სართულზე ჰქონდა, ბოლო ორი სართული კი მერიასთან შეუთანხმებლად ააშენა.

 

 

 

ტეგები

• ქუტაისი
• მშენებლობა
• ნებართვები
• ტენდერი