მოგვწერეთ იდეა

რაჭაში კიდევ ერთი სასტუმრო აშენდება

ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნულმა სააგენტომ პროექტ „50 ქონება შენი სასტუმროსთვის“ ფარგლებში ამბროლაურში, ბრატისლავა-რაჭის ქუჩაზე მდებარე ყოფილი სანატორიუმის შენობა პირობიან ელექტრონულ აუქციონზე 164 000 ლარად გაყიდა.

აუქციონის პირობების მიხედვით კომპანია სულ მცირე 30 ნომრიან სასტუმრო კომპლექსს მოაწყობს. ინვესტორების ინფორმაციით, აღნიშნულ უძრავ ქონებაზე დაახლოებით 338 000 ლარის ინვესტიცია განხორციელდება და სულ მცირე 10 ადამიანი დასაქმდება.

შეგახსენებთ, რომ „50 ქონება შენი სასტუმროსთვის“ ფარგლებში რაჭაში პრივატიზებული ეს უკვე მეორე ქონებაა. 2016 წელს ელექტრონული აუქციონის ფორმით სოფელ უწერაში 1691 კვ.მ. მიწის ნაკვეთი გასხვისდა, სადაც 12 ნომრიანი სასტუმრო აშენდება, რისთვისაც არანაკლებ 450 000 ლარის ინვესტიცია განხორციელდება.
პროექტი „50 ქონება შენი სასტუმროსთვის“ 2016 წლის ოქტომბრიდან მიმდინარეობს და უკვე ოთხი ობიექტია გაყიდული. ქ. თბილისში გორგასლის შესახვევში, N5-ში მდებარე ყოფილი სამთავრობო ავტოსადგომის მაგივრად 120 ნომრიანი სასტუმრო კომპლექსი განთავსდება. ახალი სასტუმრო მოეწყობა განახლებულ აღმაშენებლის ქუჩაზეც, ყოფილი ფოსტის შენობის ადგილზე. პროექტის ფარგლებში, დღეის მდგომარეობით, ჯამში 10 554 000 ლარის სახელმწიფო ქონება გაიყიდა, ხოლო სასტუმრო ინფრასტრუქტურის მოსაწყობად 15 000 000 ლარზე მეტი ინვესტიცია განხორციელდება.

პროექტი „50 ქონება შენი სასტუმროსთვის“ ინვესტორებს აძლევს შესაძლებლობას საქართველოს ტერიტორიაზე უკვე არსებული ინფრასტრუქტურის გამოყენებით მოაწყონ სასტუმრო კომპლექსი და გზებზე გასაჩერებელი/მოსასვენებელი ინფრასტრუქტურა. პროექტის ფარგლებში შემოთავაზებული ქონების ჩამონათვალი შეგიძლიათ იხილოთ სააგენტოს ვებ-გვერდზე: www.nasp.gov.ge